Synod News

Hospital News
Vawiin khan Presbyterian Hospital, Durtlang khawl thar. Rs. 450,000/- man Incubator (naute upna) chu Rev. Zosangliana Colney, Synod Executive Secretary i/c. Hospital-in Pathian hnenah a hlan. Khawl thar hlanna Inkhawm hi Lawmna Ward Complex-ah hman a ni a, Hospital Director Dr. Lalremthanga’n kaihruaiin, an khawl thar neih chu MP fund atanga an neih a nih thu leh a hnathawh theih dan hrang hrang leh a tangkainate a sawi a.

Incubator petu,MP Pu Vanlalzawma pawhin thusawiin Presbyterian Hospital, Durtlang tan hian thil ropui tak tihsak thei lo mah se, Pathian malsawmna an dawng hle nia a ngaih thu a sawi bawk. Pu Zawma chuan Presbyterian Hospital Nurse-te chu fakin Durtlang Hospital atanga zirchhuakte chu khawi hmunah pawh an zahpuiawm loh thu leh Nurse Care ah hi chuan khawvelah keini aia nurse nei tha an awm lo, a ti hial a; heti taka Nurse tha zirtir chhuak thei chuan Medical College pawh an din theih ngei a rin thu a sawi bawk. Khawl thar hlanna inkhawm hi Hospital Chaplain Rev V.Lawmkima’n malsawmnain a tin a ni.

Presbyterian Hospital hian Mellennium Clinic-ah October 13 (Inrinni) hian nilengin chuap entirna Spirometry a thlawnin an hawng dawn a, asthma natna nei leh chuap lam insawiselna neite tan pan theih a ni ang.

SMTC
October 15 chawhma dar 10:00 hian Synod Multipurpose Training Centre (SMTC) Hall-ah Certificate in Computer Application zirna tur hawnna inkhawm neih a ni ang.

MSSU
October 17 (Nilaini) chawhma dar 10:00 hian Pi Zaii Hall, Synod Office-ah Pathianni Chawhnu Tleirawl Inkhawm Leaders-te training neih pui tur a ni a, Upa C. Thanga, Child Evangelism Cell Committee Member-in a kaihruai ang a, Rev. Dr. R. Lalbiakmawia, Executive Secretary i/c MSSU-in thusawina hun a hmang ang a, Rev. K.M. Vanlalpeka leh Dr. Robert S. Halliday ten paper an present ang. Sawihona hun neih a ni ang a, Pu Lalthahluna Ralte, MSSU Asst. Coordinator-in a hmawr bawkna hun a hmang ang.

Kristian Thalai
NEICCYA (North East India Christian Council Youth Assembly) Committee chuan Aizawl leh Shillong-ah Peace & Christian Music Festival neih ni se, Aizawl-a neih chu CKTP-in thleng se tia a lo rel tawh angin CKTP Committee chuan he programme hi Chanmari Kohhran-ah October ni 18 &19, 2007 chhungin a thleng dawn ta a. Shillong-ah erawh chuan December, 2007 thla tir lamah neih tum a ni.

Aizawl-a neih turah hian CKTP, MTKP, SAY, EFCI, ICI, EBC, IKK leh SCM(ATC) te sawm an ni a. Aizawl chhunga KTP Branch-te chu palai pahnih theuh tir tur leh zan lam inkhawmah phei chuan a duh apiang tel tura ngen an ni. Thingtlang lama awmte tan pawh mahnia kal man intum theite tan inthlahrung hauh lova tel theihna tur a ni a. Khasi Synod pahnih Zaipawlte pawh he huna zai tur hian sawm an nih bakah tunlaia Zonet Cable TV-in Mizo Idol a thlan meka a ti tha zual mi 6-te pawh an zai bawk ang. Programme kimchang phek lehlamah tarlan a ni.

Moderator Programme
Synod Moderator Rev. Vanlalchhunga chu October 10 - 14 chhung hian Serlui Presbytery Inkhawmpui, Kawnpui Venglai-ah tel ang.

Presbytery Inkhawmpui
October 11 - 14 chhung hian Synod Inkhawmpui hnuaia Inkhawmpui lian ber Presbytery Inkhawmpui chu Mizoram chhung leh pawn Presbytery 36-ah neih a ni dawn a. Presbytery Inkhawmpuia Synod Puipate kal dan tur hetiang hi a ni:
Rev. Vanlalchhunga Moderator
Serlui Presbytery, Kawnpui Venglai
Rev. K. Lalrongheta Secretary (Sr.)
Aizawl West Presbytery, Chawnpui
Upa C. Lalmuankima Secretary (Jr.)
Champhai North Presbytery, Kahrawt
Rev. Lalhmangaiha Sr. Executive Secy.
Aizawl Chhim Presbytery, Saikhamakawn
Rev. Dr.R.Lalbiakmawia Finance Officer
Hmarthlang Presbytery, Vairengte
Rev. Zosangliana Executive Secretary
Chhimthlang Presbytery, Reiek
Rev. C. Rosiama Finance Officer
Zoram Pawn Presbytery, Kohima
Rev. Rualkhuma Statistician
Aizawl Presbytery, Chhinga Vengthlang