Synod News

Rev. Chanchinmawia kan chan ta
Rev. Chanchinmawia, Synod Moderator kalchhuak, Khatla Pastor Bial enkawl mektu chu October 1 (Thawhtanni) zing khan anmahni chenna Pastor Quarters-ah thia hmuh a ni. A thih dan tak hi chiang taka hriat a ni lo va, Aizawl Civil Hospital-ah post mortem a ni a; a thih danah thil chhui chian ngai awma hriat a ni. A ruang hi lumenpui a ni a, October 2 (Thawhlehni) chawhma dar 11:00 ah an chenna Khatla Pastor Quarters-ah thlahna neih a ni a, chawhnu dar 1:00 ah Khatla Kohhran Biak Inah Rev. Dr. R. Lalbiakmawia, Synod Senior Executive Secretary charge la mektu chuan a vui a ni.

Zin
Rev. Zosangliana Colney, Executive Secretary i/c Mission chu Micah Network Consultation, Malaysia-a neihah a tel a, October 6 hian Aizawl a lo thlen beisei a ni.

FG & CC
October 6 & 7 hian Tlungvel Pastor Bial huapin Kristian Chhungkaw Seminar neih a ni dawn a, seminar neihpui tur hian Rev. Zothansanga, FG&CC Family Counsellor; Rev. R. Ramnghinglova, FG&CC Committee Member; Lalmalsawma leh Sangzuala Chhangte (Soloist) te an kal ang.

Revival
October 6 & 7 (Inrinni zan - Pathianni zan) hian Bukpui Kohhranah Crusade neih a ni dawn a, Rev. F. Lalrinnunga, Revival Director chu Speaker a ni ang.

Social Front
October 6 & 7 hian Zamuang Bialah Political Education Seminar neih a ni dawn a, Pu Bonny Lalrindika,
Asst. Coordinator, Social Front leh Rev. Lalbiakvulmawia ten hun an hmanpui ang.

Music
October 4 & 5 hian Hnahlan Kohhranah Music Training neih a ni dawn a, training neihpui tur hian Pu Lalromawia, Music Instructor; Pu Lalchamliana, Kanan Veng leh Pu Lalhruaia Rawite, Synod Office-te an kal.

Kohhran Hmeichhia
October 5 - 7 hian Phuldungsei Kohhranah Leadership Training neih a ni dawn a, Central Kohhran Hmeichhe hruaitu - Pi Lalrinkimi, Coordinator i/c Hmeichhia, Pi Lalthari Ralte, Pi K. Lalbiakzami leh Pi C. Lalbiakdiki ten hun an hmanpui ang.

Kristian Thalai
October 18 & 19 hian North East India Christian Council Youth Assembly (NEICCYA) programme pakhat, Peace & Christian Music Festival, Chanmari Kohhran Biak Inah buatsaih a ni dawn.
KTP General Conference vawi 52-na, February 28 -March 2, 2008 chhunga Bilkhawthlira neih turah Synod Information & Publicity leh Youth Internet Ministry (Youthim) tangkawp chuan Online Video Streaming hmangin Live-a pekchhuah an tum a. Bilkhawthlirah hian Internet connection a la awm lo va, hemi atan bik hian BSNL lamin broadband connection an tihsak theih beisei a ni.

Moderator Programme
Synod Moderator Rev. Vanlalchhunga chu October 5 - 7 hian Partnership Missionary Gathering, Shillong-ah telin Shillong Pastor Bial a tlawh nghal ang.

Synod H/S School Eco Club-in sahuan tlawh
September 29 khan Synod Higher Secondary School-a Eco Club member 100 chuangin Wild Life Week denchhenin Aizawl Sahuan an tlawh. Zirtirtute kaihhruainain zirlaiten sahuan hi an fang a, nungchate humhalh tulna leh duat an tulzia an zir. Sahuana thawktuten tha takin an lo tawiawm a, Dr. Vanlalhruaia, Veterinary Asst. Surgeon chuan zirlaite hnenah sahuan chungchang thuchah ngaihnawm tak a sawi. Synod Higher Secondary School Eco Club chuan Wild Life Week chhungin he sahuan hi tlawh ve turin mi zawng zawng an sawm a, ramsate hmangaih tur leh kan tana an hlutzia hre thar turin Mizo mipuite an ngen a ni.

Prescom Annual Meeting
October 5 (Zirtawpni) hian Presbyterian Communications (Prescom) Department Staff Welfare chuan Annual Meeting an hmang dawn a, Aizawl khawpui chhunga Synod Bookroom leh Synod Press khar a ni ang a, dawr theih an ni lo vang.

Mizoram People Forum
Vawiin (Oct. 4) chawhma dar 11 hian Mizoram People Forum General Body Meeting, Synod Conference Centre (Pi Zaii Hall)-ah neih a ni a, District Forum tin atang leh Local Forum tin atangin an kalkhawm a ni. Hetiang hian hruaitu thar an thlang:
President
Moderator, Synod
Vice Presidents
1. Rev. Dr. R. Lalbiakmawia, Exe. Secy, Mizoram Synod (Sr.)
2. Exe. Secy. i/c Social Front (Mizoram Synod)
3. Administrative Secretary, ECM
4. President, MUP Hqrs.
5. President, Central YMA
Gen. Secretary
Upa Lalramthanga (Mizoram Synod)
Secretary
Dr. Lalbiakmawia Ngente (CYMA)
Joint Secretaries :
1. Pu B. Thangtinliana (Catholic Church)
2. District Superintendent (Wesleyan Methodist)
3. District Superintendent (EFCI)
4. Coordinator (Synod Social Front)
Treasurer
Pi Lalbiaknungi (MHIP Hqrs.)
Fin. Secretary
Upa Sainghinga Sailo (MUP)
Advisers
1) Bishop of Aizawl Catholic Church
2) Senior Executive Secretary Mizoram Synod
3) Pu L.H. Lianhrima Legal Concern
4) Dr. L.N. Tluanga Prominent Citizen
5) Pu Robert Lalchhuana Jounalist