Editorial

Kohhran Inkhawm zai
Kan kohhran Pathian biak inkhawm a lo nawm lehzual theihna atana kan kohhran zai hruaitute leh kohhran committee lam atanga mawhphurtu-te thahnemngaihna avang leh inpekna avangte pawh a ni ang a, kan kohhran biak in zaiho pawh in hma a sawnin, kohhran mipuite tan pawh zai a nuam thin khawpmai. Zai hruaitute leh a enkawltute inpekna a ropui a, fak an phu a ni. Tha thlah miah lo in han tang zual zel sela, Krismas vuakvet lai pawhin hetiang ang kan nih reng theih na turin tan han la zel bawk teh se.

Chutih rual chuan hmasawnna tur erawh kan la nei in a lang. A bikin Lengkhawmzai ah hian tan leh zual a, inzirtir pawh a ngai hial awm e. Lengkhawmzai ah hian thalai lam zai hruaitute hian kan senior-te kian mai lo hian, mahni inrintawkna nen hla te pawh hi lak ngam ahun ve tawh lawm ni?( Kan senior ten ngaihloh lamah lo ngailo se). A Key tawk kan hre mai lo a nih pawhin kan Keyboardist te nen tangrualin a key tawk awm te hi hlabu lamah hian chhinchhiah ni ta se, kan harsatna thenkhat hi chu a kiang ngei ang. Tin, lengkhawm hla kan sa dawn a nih pawhin keybordist te hian a key rawn pe nghal mai thei turin a insiamrem theih niin a lang. Lengkhawm zai kan han sa a, kan sak laiin keyboard tumtuin a key mil tur a rawn zawng a, zai lawklawh lai taka a rawn ri tang tang mai thin hi chu a kohhran pui zia lo deuh tawh em a tih theih. A tul anih chuan Keyboard in key a pek mila lak dan te pawh hi inzirtir hial nise a tha tawh zawk lawng maw? Hmasawn zel tur kan ni a, hote anga lang si, kan hmasawn tulna langsar tak a ni awm e. Han tang zual zel teh se.