Basirhat Pastor Bial rawngbawlna report

- Rev. PS Daniel

Kolkata Mission Field hi 1988 kuma hawn a ni a. Tunah chuan kan field pumpuiah Partor Bial 4 a awm a, chungte chu - Kolkata, Mathurapur, Basirhat leh Maniktala a ni a. Tuna rawngbawlna leh report kan han tarlan tur hi kan awmna bial Basirhat bial chanchin a ni e.

Basirhat bial bikah hian centre(Preaching Station kan ti ang hi)9 a awm a. Sub Centre 7 a awm bawk. Biak in kan tih ang hi chu a hmingin 3 kan nei a, adang hi chu mi in luah hawh in (House Church) inkhawmna kan nei thin a ni.

Centre pakhat hi Evengilist 1 zel in an awm chilh a, kan bial bikah hian member 2020 (June 2007 thlengin) kan awm a, kan awm hnuah hian ringthar 1300 vel kan neih belh bawk a ni. Tuna kan awmna hmun Basirhat Centre Counpound chhungah hian evengilist 1 leh nurse 1 an awm a, Free Clinic Nilaini leh Inrinniah Doctor pakhat ruaiin hawn a ni thin. Clinic-ah hian damlote Doctorin a en hmain Devotion neihpui thin an ni.Damlo hi a tlangpuiin 15 vel an lokal thin a. Tin, Non-Formal School kan nei bawk a, zirtirtu 2 in an enkawl mek bawk a ni. Tunah hian Basirhat Christian Centre hmunah Puanthui zirna hawn a ni a, mi 11 in an zir mek a ni. Kan Biak-inah hian Sunday tukah dar 9:30 ah inkhawmna neih thin a ni a, mi 20 atanga 33 kan inkhawm tlangpui thin a, tam kan inti ve hle thin a ni.Heng kan member lo inkhawm thin te hi hmun hla tak tak atanga lokal te an ni hlawm a, Biak Inah hian Maicham leh thuthleng kan la nei lova, chhuatah kan thu mai thin a ni.Biak-In Ceiling kan la nei lo bawk a, khawlum lai chuan a hreawm duh thin khawp mai. Pathianin tul atih hunah chuan hengte hi ami te kal tlangin min le pek ve ngei kan ring tlat a ni.

CHRISTMAS FESTIVAL 2006 :
He Christmas Festival hi sum engmah nei lovin kan han rawt ve tawp a kha a ni a, nangnin in mi tawngtaipuina leh tanpuina azarah Festival chu tluang takin kan hmang zo thei ta. Ni thum chhung 23 atanga 25 neih a ni. A nikhat ni hian mipui tan neih a ni a, tin, Basirhat Pastor Bial chhunga naupangte Johana Bu anmahni centre theuhah exam tir anni a, exam pawh an thahnem hle, Cetre tina pakhatna atanga pathumna theuh te hemi ni hian lawmman sem theuh an ni bawk a, Tin, Kolkata atangin zaithiam (Gospel Band) rawih anni a, Zaithiamte hian Pathian fakna hla hmangin mipuite min awi bawk a, Item chi hrang hrang mipuite hip thei tur neih a ni bawk a, Solo leh Gymnastic leh lam chi hrang hrangte entir a ni bawk.Tin, kan evengilist zinga pakhatin pathian thuchah ropui tak puanchhuahna hun ahmanga lokal khawm zawng zawngte’n an ngaithla tha hle a, Sound System tha tak hire a ni a, kan thawm hre phak pawh an zau ve hle a ni.

Tin, a ni hnihna hi VIP pual kan vuah ve a, kan Non Formal school te nalh taka cheiin a chhungah khung khawmin hun hmanpui an ni a, khawchhunga mi pawimawh tak tak, MLA te, Panchayat Memberte, BDO te, Town Police te, Doctor te leh dawrkai lian tak tak te sawmkhawm an ni a. Kan theihtawka tuihnai eiturte buatsaihin Pathian thu sawina hunte hman a ni. Evi leh Adama atanga sual kan nihna te, Pathian tak hriat chian a pawimawh ziate leh amah nen inlaichinna(relation) a pawimawhziate, chhandam ngai kan nih zia te, Christmas kan hman chhan te sawifiah a ni a, an ngaithla tha in an ngaithla uluk hle a ni.Mipui lam atangin zawhna hunte siam a ni a, zawhna leh chhanna hun thatak kan hmang a, Pathian hmangaihna awmziate min zawt bawk a, tin, lokal zawng zawng te hi Bible leh lehkhabu dang, pen tha tak leh pangpar present vek an ni a,anni pawhin nuam an ti hle a ni. Thenkhat chuan “helai hmunah hian Christiante Biakin a awm tih reng reng kan hre lova, kan naupan laiin Christian Convention Schoolah kan kal thin a, helaiah Christain Biak-inah Christmas kan hmang thei hi kan lawm hle a ni” te an ti ve a. Helaiah chuan mi kohkhawm an harsa em em a, nikhat pawh hunawl nei thei lo te an ni a, mahse, in mi tawngtaipuina azarah Lalpa’n kan misawm ang ang te min rawn hruaikhawm sak a, kan lawm hle a ni.He VIP programme bik hi a zawngchhang thlak hle in kan hria a ni. Lalpa chu fakin awm rawh se.

Tin, a ni thum ni Christmas ni takah hian Christmas porogramme pangngai chawhma dar 10 ah hman a ni a, Biakinah kan biakin khat tlatin kan inkhawm ve a, hemi ni pawh hian hmun hrang hrang atangin an lokal khawm a, programme tha takin kan hmang a, lokal zawng zawngte Cake tuitak leh eitur chi dang dang pek vek an ni. Christmas a lokal tam zawk te hi Christian an ni.

Tlai dar 4 ah Christmas Programme hi Pandalah hman chhunzawm leh a ni a, Isua flim chhuah a ni a, pandal khat tlatin entu mipui an lokal khawm a, lokal zawng zawng te hi cake tui tak sem vek an ni a, kan hlim tlang hle.
Kan programme hlawhtlin theihna zawng zawng hi nangnin in mi tawngtaipuina leh in mi tanpuina vang liau liau ani a, Lalpa’n a let tam takin a rul let ang che u in, mal a sawm ngei ang che u. Lalpa chu ropui ber rawh se Amen.

(Nb - Lehkha hi tunthla a kan dawn a ni a, rawngbawlna report thenkhat te phei hi chu a rei tawh deuh avangin Rev. P.S.Daniela pawh a inthlahrung hle a, rei deuh tawh mahse Pathian ropui nan min lo chhuahsak dawn nia tiin lehkha a rawn thawn a ni. Tin, an Christmas Festival hman nan hian kan branch pawhin Rs. 3500/- in kan tanpui a, lawmthu sawina lehkha pawh kan dawng tel a ni.)