Aizawl Hmar Presbytery Inkhawmpui tluang taka zawh a ni

Aizawl Hmar Presbytery Vawi 29-na chu Dt. 11-14 October 2007 chhung khan Zuangtui Kohhran Biak In ah tluang taka hman zawh a ni ta. He khawmpui ah hian Thlarau lam thupui “Ringtu nun - Tawngtaina” (I Thes 5:17) tih a ni.

Khawmpui thlengtu, Zuangtui Kohhran hi Dt.14.11.1982 khan Bialtu Pastor Lalchama’n a hawng a, kum 1986 January Ni 19 khan Kohhran puitlingah hlankai a ni a. Tuna khawmpui hmanna Biak In hi Dt.15.4.1983 Zirtawpni zing dar 11:30 ah Bialtu Pastor Lalchama’n lungphum a phum bawk a ni. Tunah hian Kohhran member 1346 awmin, dan zawhkim member 906 an ni mek bawk. He khawmpui thleng tura an inbuatsaihna hi a ropui hle a, biakin hmunhma in a lo zir bawk nen, engkim mai a felfai in, sawisel tur a vang hle.

Khawmpui thurel pawimawh deuh deuhte lo tarlang i la:-

1. “Synod Mission Board hian Direct Evangelism lamah tun aia nasa zawk a tan a lak theih nan, Budget tam zawk dah ni rawh se” tih Bawngkawn Bial atanga lut chu Synod hmalak mekna a nih thuin hrilhfiah a ni.

2. “Presbyterian School zawng zawng hi Exam Question Paper, Synod in siamsak rawh se” tih thu Durtlang Bial atanga lut chu Synod hmalak mek na a nih thu in hrilhfiah a ni.

3. “Synod Inkhawmpuiah hian Palai nisa tihtlem ni rawh se” tih Zemabawk Bial atanga lo lut chu, ‘Synod ah kal zel rawh se’ tih a ni.

4. “Tul bik thilah Hmeichhe Ordination neih theih dan kawng zawn ni rawh se” tih thu Leitan Bial atanga lo lut chu ‘Kan sawihona hi a tawk e’ tih a ni.

5. “MSSU- in Award a siam thin hi tun aia changkang zawka siam ni rawh se” tih thu Thuampui Bial atanga lo lut chu ‘MSSU ah thlen ni se’ tih a ni.

6. “Inneih Registration Fee hi tihtawp ni rawh se” tih thu Durtlang Bial atanga lo lut chu ‘kan sawihona hi a tawk e’ tih a ni.

7. “Regional Assembly neih dan tur kawng zawngtu Commission din ni rawh se” tih Leitan Bial atanga lo lut chu ‘Kan sawihona hi a tawk e’ tih a ni.

8. “Field Pastor (Native Pastor-te) leh Pro.Pastor-te Mizorama an thawh chhungin Special Allowance pek ni rawh se” tih thu Bawngkawn Bial atanga lo lut chu ‘Synod-ah kal zel rawh se’ tih a ni.

9. “Presbytery Finance Committee Member-ah hian Bialtu Pastor telh ve ni rawh se” tih thu Zemabawk Bial atanga lo lut chu ‘Bialtu Pastor leh member pathum thlan hi kan Presbytery kalphung ni rawh se’ ti a siamrem a pawm a ni.

10. “Synod Literature & Publication Board kalphung enthat ni rawh se” tih thu Leitan Bial atanga lolut chu Synod hmalak mekna a nih thu in hrilhfiah a ni.

11. Mizoram Synod hian Mizorama Nepali/Gorkhali-te zinga rawngbawlna beihpui thlak dan kawng zawng rawh se” tih thu Bawngkawn Bial atanga lolut chu ‘Synod Mission Board-ah thlen ni rawh se’ tih a ni.

12. “Non Mizo Evangelist-te lawmman tihsan dan kawng zawn ni rawh se” tih thu Bawngkawn Bial atanga lo lut chu ‘Rawtna awm mek’ a nih thuin hrilhfiah a ni.

13. Kan Synod-in Partnership-a Misionary kan tirhchhuahte hi an Service tih chian ni rawh se” tih thu Leitan Bial atanga lo lut chu Synod in a kalpui mek a nih thu in hrilhfiah a ni.

Khawmpui-ah hian Kohhran Upa pahnih Dr.K.Lalrintluanga,Durtlang Kohhran leh Pu.C.Lalbiakmawia, Thuampui Kohhran te nemngheh an ni a, Kohhran Upa thlan diltu Kohhran 10 awm in, Kohhran Upa hi avaiin 37 thlan tur a remtih a ni. Tin, Kum 2008 Synod Khawmpuia nemngheh turin Pro.Pastor Surendra Bahadur Gurung, Leitan Bial Pro.Pastor chu Presbytery in Synod ah dilsak tur a tih a ni bawk a ni. Kumin ah hian Pro.Pastor hna dil mi 9 kan Presbytery hian kan nei a, kan Kohhran atangin heng mite:- Tv.C.Lalruatkima BD s/o C.Lalbiakmawia, Tv.R.Lalfakawma BD s/o Rev.R.Thangvunga, Tv. Albert Kawldingliana BD s/o R.Thanchunga te an tel a. An zavaiin Presbytery in Synod khawmpuiah a dilsak vek dawn a ni. Kumin Presbytery-ah hian Kohhran Upa Chatuan ram min pansan ta, mi panga(5) sunna neih a ni bawk. Presbytery khawmpui boruak a nuam thawkhat hle a, zai pawh kan tui thei khawp mai.

Kumin Presbytery-a Thlarau lam thupui hi kan bialtu Pastor, Pastor R.Ramhnginglova’n Inrinni zan khan ngaihnawm takin a sawi a, kan Bial Zaipawl-te Zirtawp zanah thiam, takin an zai a, kan kohhran zaipawl-te pawh Pathianni zan khan thiam tak bawkin an zai a ni.

Treasurer Report
(Presbytery Sum)
Hmuh zawng zawng :- Rs. 31,064:00
Hman zawng zawng :- Rs. 19,747:00
Hman bang :- Rs. 11,317:00
Kum 2008 Presbytery Budget Estimate:-
Hmuh beisei :- Rs. 39,317:00

(Synod leh tualchhung sum)
Pathianram :- Rs. 247,91,545:00
Tualchhung sum :- Rs. 125,60,891:00
Ramthar :- Rs. 70,15,527:00
Buhfaitham :- Rs. 29,63,435:00
Sunday School :- Rs. 1,06,941:00

Statistician Report
Pastor Bial vawng zat :- 5
Minister Bial vawng lo zat :- 38
Pasor/Rev zawng zawng zat :- 43
Pro Pastor zat :- 1
Kohhran Upa zat :- 123
Kohhran Member zat :- 23,789
Mipa zawng zawng zat :- 11,754
Hmeichhia zawng zawng zat :- 12,035
Dan zawhkim zat :- 16,288

Chhinchhiah tlak zual te
1) Nikum aiin naupiang zat 4 in kan tlem a, chhungkaw 13 zelah naupiang pakhat zel awm ang kan ni.

2) Nikum aiin Dan zawhkim thar 38-in kan tlem.

3) Nikum aiin pawl danga tanga lo pakai 136 in kan tlem.

Kum 2008 Presbytery
A hun :- Dt.9-12 October 2007
A hmun :- Leitan South Kohhran
Thupui :- “Beiseina nung” I Pet.1:3

Moderator :- Upa C.Lalbiakthanga Bawngkawn
Secretary (Sr) :- Upa H.Zoliana, Durtlang Vengthar
Secretary (Jr) :- Upa Lalbiakliana, Zemabawk
Statistician :- Upa K.Lalchungnunga, Zuangtui
Treasurer :- Upa Vanlalthanga Leitan ‘S’