Rawngbawlna ngaihpawimawh
Kum 5 vel kalta ah khan kum danga kan neih thin ang tho in Branch hian thupui kan nei thin a, chung hun laia kan thupui chu “Rawngbawlna ngaihpawimawh” tih hi a ni. Tunlai hian he thupui hi kan mamawh leh ta viau in a lang. Kan Pastor Pension pakhat chuan hruaitu tharte a hlanna ah thu a tiamtir a, chuta an thutiam chu “He rawngbawlna hi pawl dang zawng zawng leh thildang zawng zawng aiin ka ngaipawimawh ber ang” tih a ni. Khami hun laia hruaitute rilru leh ngaihtuahna pawh kha a vawng tha viau niin an sawi nghe nghe.
Kan rawngbawlna hna hi kan chhut chian chu a ngai viau mai.Tamtak chuan kohhran emaw KTP emaw a kan mawhphurhna min hlen loh tir thei thil dang pawimawh si kan ngah duh in, insiamchawp pawh hi kan pawiti vaklo ni pawhin alang thin. He lai tak hi tunlaia rawngbawltute hian kan mamawh leh kan ngaihtuah chhunzawm ngai tak chu a ni.
Lal Isua’n a ngaihpawimawh ber chu a rawngbawlhna hi a ni a, Chu chu Bible-ah pawh kan hmu a, “Kaisar thil chu Kaisara hnenah Pathian thil chu Pathian hnenah” a ti mai a ni.Chawhpawlh vak kha tul a tilo a niang. Hei hi kan riulru ah pawh kan vawn reng a ngai a ni. “Ka tih lai mek hi thiltha tho a lawm, inkhawm, Committee, fellowshipo etc. tih loh phah nan hmang mah ila, a pawina ka hre vak lo” tiin kan inthiam chawp a. Rilru ah inthiam tak tak chuang silovin kan awm reng thin.Petera chuan”Kan rilru-in thiamloh min chantir loh chuan Pathian lamah kan huai a ni” a ti mai. Kan dinhmun theuh hi kan inbih chian a, kan ngaihpawimawh hmasak tur awm leh kan dah hmasak tur awm hi tunlai rawngbawltute, abik tak in Thalaite phei hi chuan kan thliar thiam hi a pawimawh deuh deuh awm e. Tuna kan thliar thiam loh chuan kan tu leh fate lo la awmzeltur te tan a pawi thei dawn si a.
Saturday, October 20, 2007
Editorial
Taihmakna - Chhungkuaah (Chhunzawmna)
THATCHHIAT RAHCHHUAH
Tunlai thlaite zinga sualna chi hrang hrang lo pung nasa ta em em mai hi kan thatchhiat rahchhuah a ni thei ang em? Chhungkua ah tangkai kan tum si lo, hunawl kan ngah em em a, hunawl khawhralna tha kan zawng bawk si lo (nge kan nei lo zawk?). Hunawl hnawhkhah dan kan zawng a, a nilo lamah kan pen phah a ni mai lo maw? Kan hunawl neihte a tangkai zawng leh chhungkaw hmasawnna ngaihtuahna atana hman ai chuan, thatchhiatna in min zem mutchhuak a, ruihhlo ah kan tlan a, harh aiin kan zawi tawlh tawlh zawk mah a, nulat tlangvalna kawngah kan tlan a, harh aiin taksa leh rilru a vaw chau a, thlarau nun a tihlum zawk bawk si.
Duhzawng kan ngah a, it zawng kan ngah em em, tunlai khawvel changkanna chi hrang hrang in min chim reng bawk. Kan thatchhiat tlat si avang in awlsam taka duh zawng leh it zawng neih duhnaah min hruailut a, ruk ruk kan thanhnan leh a, chu chuan hming thatna aiin hmingchhiatna min phurhtir zawk bawk si. Heng hian min tibuailo a nih pawh in, mahni inah thawhtur reng reng neilo ang maiin kan thu zawi ngawih ngawih a, thutthleng sei thluang tlang zuar chung in TV remote kan hum run a, ennawm chi hrang hrang leh maksak tak tak nen kan inawm nileng thak zel mai si a. Chung atangte chuan thiltha leh kan nun kaihruai tur zirchhuah chu sawi loh, kan riltam inhnangfak na tur in a tui tha leh a hmui tha tha kan la demand zut zut reng bawk si a. A buai zo vek mai thin a nih hi. Tunlai a lar tak ‘Setana Pawl’ kan tih te pawh hi kan thatchhiat rahchhuah, inchhung tana taihmak kan chhuah peih loh nghawng chhuah a nih a rinawm thei ang. Heng zawng zawng lo awm theihna chhan chu kan hunawl neih ang ang te mahni chhungkaw tan, atangkai zawng a kan hman tlem vang a ni mai. Mahni chhungkua theuhah taihmak chhuah in, ‘ka pawimawh a, chanvo ka nei a ni’ tih pawm ngam in hma la ila, kan hunawlte hi chhungkaw hmasawnna hawi zawngin hmangral tam thei ila, heng sualna kawng hrang hrang te hi a beih a beih vak ngai lo leh, a do a do vak ngai lo hian a ziaawm duak zawk lo maw? Heti khawp hian sual do in phe phe ve thin mah ila, a tobul ah Chhungkaw tana taihmakna kan in zirtir fuh loh a, kan tette atanga kan in thanhnan tir si loh chuan engmah a sawt chuang in a rinawm loh. Chhungkaw tana Taihmakna hi thisenah tet te atangin inthanhnan tir tlat i la, ‘Kristian Chhungkua’ hi a hranpa a Campaign Programme neih/buatsaih a ngai dawn em ni? (Karleh ah chhunzawm a ni ang)
Lawrkhawm
Hnatlang
Mika Group te chuan budget tuak nan thawhtanzan khan Bawngsa Pickle an zuara, tlawmngaia lo dawrtu zawng zawng chungah Group hruaitu ten lawmthu an sawi tak meuh meuh a ni. Tin, Hosea Group te pawn sumtuak nan hian pickle tho an zuar ve bawk a, an ni Group pawh hian lo dawrtu zawng zawng chungah lawmthu an sawi bawk a ni.
Seminar ah tel
Durtlang Centenary Health & Sanitation Sub - Committee te hmalakna in Dt 18.10.2007 (Ningani) zan khan M.C Hall Auditorium-ah seminar a buatsaih a. He seminar-ah hian Branch O.B leh KTP Inleng Editorial Staff te min rawn sawm angin kan Branch O.B te an kal nual a, tin, KTP Inleng aiawh in kan Joint Editor Pu Lalnunsanga Ralte a tel a ni. Hemi zan hian thupui ‘Land Pollution and its Impact’ tih thupui zir hona hun neih a ni a, Thupui hi Pu . V. Lalnunmawia Programme Officer, NSS Unit, Aizawl North College in zirtirna hun hi a hmang.
KTP Inleng Internet-ah
Kan Branch Chanchinbu KTP Inleng hi hmun hrana kan member pui leh a duh apiangin an lo chhir ve zel theih nan Internet kaltlanga chhiar theih tur a dah a ni ta a, Interneta chhiar theiha min up-load sak tu hi kan Editor Tv. C. Vanlalchhanhima a ni a. Tin, Youthim tunlaia kan zoram chanchin Internet hmanga vawrhdarh thin tu ten min up-load sak bawk. Hmun hrana awm kan chhungte leh kan thiante i hrilh darh zel ang u. En theihna chu ktpInleng.blogspot.com ah leh ktpinleng.youthim.org ah te a ni e.
Christian Music Festival
NEICCYA (North East India Christian Council Youth Assembly) buatsaih Peace & Christian Music Festival thawhkhatna chu Chanmari Kohhran-ah October ni 18 &19, 2007 chhung hian neih a ta. A zan hnih programme hi Zonet Cable TV kaltlangin LIVE-a pekchhuah a ni. Festival thawh hnihna chu December thla tir hian Shillong-ah buatsaih tum a ni.
Aizawl-a neih turah hian CKTP, MTKP, SAY, EFCI, ICI, EBC, IKK leh SCM(ATC) te sawm an ni a. Aizawl chhunga KTP Branch-te chu palai pahnih theuh tir tur leh zan lam inkhawmah phei chuan a duh apiang tel tura ngen an ni. Thingtlang lama awmte tan pawh mahnia kal man intum theite tan inthlahrung hauh lova tel theihna tur a ni a. Khasi Synod pahnih Zaipawlte pawh he huna zai tur hian sawm an nih bakah tun hnaia Zonet Cable TV-in Mizo Idol a thlana ti tha zual mi 6-te pawh an zai bawk. He hunah hian kan Branch atangin Pu C. Lalthantluanga, Pu.K. Lalbiakthanga leh Tv. Lallawmkima te an tel a ni
Kristian Naupang Lawmman sem
October 19 (Zirtawpni) chawhnu dar 12:30 hian Moderator Rev. Vanlalchhungan Zosapthara Building Synod Committee Room hluiah Kristian Naupang Intihsiakna Hlimawm Lawmman a sem ang.
Bial Zaipawl Hla zir ngawrh
Tun thla tawp a, Sakawrdaia CKTP buaisaih Music Festival a zai tura sawm an nih angin Durtlang Pastor Bial Zaipawl te chuan ngawrh takin hla an zir mek zel a, he hunah hian Mizorama kan Top Artist te bakah Synod Zaipawl te pawh an kal dawn bawk a. Rawngbawlna tha tak leh nung tak an neih theih nan i tawngtaipui ang u.
World Christian News
Thih chilh bomb vangin thi
September thla tawp lam khan Sudan rama Khorfulus khuaa inkhawm an neih laiin thih chilh bomb pai (suicide bomber) mi pakhat chu sipai inthuama inthuam in Biak In chhungah a lut a, a bomb tihpuahah hian helai Biak Ina inkhawm mi 5 in nunna an chan niin Compass Direct News chuan a tarlang.
He misual hian a kawnghrena a grenade pai hmangin he pawi hi a khawih a.Sawrkar hruaitu lam chuan he thil hi Sudan People's Liberation Army-a sipai pakhat ruiin grenade a tihpuah vanga thleng niin an tarlang a, hei hi sawrkar thuchhuah a nih laiin SPLA Major General pakhat chuan he thil hi Christiante tihthlabarna tura tih a nih thu a sawi ve thung. Sipai hotute lam chuan pawikhawihtu hi an hre thei lo niin an sawi a ni.
Jerusalem tana tawngtaina
Christian Post chuan Pathianni kaltaa khawvel puma Jerusalem tana tawngtaina neih chu a hlawhtling hle niin a tarlang. Jerusawlem hi Christian leh Juda sakhaw hmunpui a ni a, pastor, rabbi leh Israel mi pawimawh tamtakin khawvel hmun hrang hranga an tih angin Jerusalem khawpui chhungah he tawngtaina hun hi an hmang a.Hetianga tawngtairualna hi Day of Prayer for the Peace of Jerusalem (DDPJ) tih a ni a. Kum tina hman thin niin kumin hi a vawi 5-na a ni. Jerusalem Post in a tarlan danin he tawngtai runpuiah hian khawvel ram hrang hrang 150 atanga kohhran 1,50,000 vel zet an tel a ni. "Kan rinna leh Israel ram politics chungchanga kan ngaihdan chu engpawh ni se, tunlai thilthleng avang hian Bible in min hrilh angin tawngtaina tur chu kan nei a ni", tiin he hun huaihawttu zinga mi Rev. Robert Stearns chuan a sawi a ni.
Rawngbawlna hmunah chauh kawr nghawng var
Kohhran leh rawngbawltute sahimna lam buaipuitu pawl National Churchwatch chuan Catholic leh Anglican puithiamte chuan an kawr ngawng var chu rawngbawlna hmunah chauh ha tawh turin an duh tih a tarlang. He thu hi Canadian Press chuan tarlangin hetianga tih a nihna chhan hi heng puithiamte hian an 'uniform' an hak hian misual kut an tawrh duh bik vang niin a tarlang bawk. Misual tamtak chuan puithiamte hi pawisa nei tura an ngaih avangin suam an ching hle a, an kawr ngawng var hian Pathian laka lungawi lote kut lakah a ti him lo zual niin National Churchwatch hotupa Nick Tolston chuan a sawi. "Puithiamte hi anmahni a an awm fal hian an tan a hlauhawm bik a, bazar an kal nikhua ang te hi chuan an kawr nghawng var hi an ipte ah te ak hrih se an tan a him zawk dawn a ni", tiin a sawi bawk. Puithiamte laka pawikhawihna hi sawrkar lamin a hranpaa chhiarna a nei lem lova. Nimahsela kum 2001-a University of London-in an zirchianna ah chuan 1997 leh 1999 inkar khan puithiam 10-a 7 in kawng engemaw zawng talin misual kut an tuar niin a tarlang a ni.
'Anti-Conversion' law
Himachal Pradesh sawrkar chuan sakhaw inleh khapna dan "Anti-Conversion" law chu a hmang tan ta niin Compass Direct News chuan a tarlang. Himachal Pradesh hi India rama 'Anti-Conversion' law hmang 4-na niin Chhattisgarh, Orissa leh Madhya Pradesh ah te an lo hmang tawh a. Chhatishgarh hian he dan hi hmang mek mahse an governor in Attorney General of India ngaihdan a la mek a ni. Christian Legal Association-a Lansinglu Rongmei chuan he dan hi an pawl in an khin dawn thu a sawi tawh a ni. Himachal Pradesh in an hman tur 'Anti Conversion' law ah hian sakhaw danga inlet duh reng reng chuan an inleh hma ni 30 a awm ah inleh an duh thu hi an sawi tur a ni tih te a tel a ni.
Synod News
Presbytery Inkhawmpui
Presbytery hrang hrang Inkhawmpui (Oct. 11-14) chu tluang taka zawh a ni a, Presbytery thurel leh report-te Synod Office-ah theh luh mek a ni. Aizawl khawpui chhung Presbytery 6-ah Upa thlan thar 26 nemngheh an ni a, thlan nawn 4 puan an ni bawk. Hetiangin - Aizawl Presbytery (Chhinga Veng)-ah Upa 6 nemngheh, Aizawl Bethel (Chaltlang South)-ah Upa 2 nemngheh + thlan nawn 1 puan, Aizawl Chhim (Saikhamakawn)-ah Upa 11 nemngheh + thlan nawn 1 puan, Aizawl East (Bethlehem)-ah Upa 3 nemngheh, Aizawl Hmar (Zuangtui)-ah Upa 2 nemngheh, Aizawl West (Chawnpui)-ah Upa 2 nemngheh + thlan nawn 2 puan.
Social Front
October 20 - 22 hian Mualpheng Kohhranah HIV/AIDS Awareness Campaign buatsaih a ni dawn a, Dr. Robert S. Halliday, Social Front Coordinator leh Upa Lalbiakmawia Khiangte, Social Front Committee Member-ten hun an hmanpuii ang.
October 20 - 22 hian Sihfa Kohhranah Social Front Awareness Campaign buatsaih a ni dawn a, Pu Bonny Lalrindika, Social Front Asst. Coordinator-in hun a hmanpui ang.
MSSU
Nimin (October 17) khan Pi Zaii Hall, Synod Office-ah Mizo Sunday School Union (MSSU) buatsaih “Pathianni Chawhnu Tleirawl Inkhawm Leaders-te training” neih a ni. Training-ah hian Aizawl Khawpui chhung Kohhrante sawm an ni a, mi 120 an lo tel thei a ni.
Upa C. Thanga, Child Evangelism Cell Committee Member-in training hi a kaihruai a, Rev. Dr. R. Lalbiakmawia, Executive Secretary i/c MSSU-in thusawina hun a hmang bawk.
Training-ah hian paper zirho a ni a, Tleirawlte mizia leh an harsatnate - Rev. K.M. Vanlalpeka ziak leh Tleirawlte zinga rawngbawl dan tha - Dr. Robert S. Halliday ziak te an zirho a; sawihona hun tha tak an nei zui bawk. Pu Lalthahluna Ralte, MSSU Asst. Coordinator-in a hmawr bawkna hun hmangin training hi a khar a ni.
Mizo Sunday School Union (MSSU) hian tunhnaiah Beginners leh Primary Departments Leaders’ Training an lo buatsaih tawh bawk a ni.
P.C. Girls’ School Day Vawi 4-na Hmang
October 15 khan P.C. Girls’ School chuan ‘School Day’ hlimawm tak an hmang. P.C. Girls’ School hi kum 1903 a Zosap Missionary-te din a ni a, kum 2003 khan School Centenary ropui takin an lawm tawh nghe nghe. Kum 2003 khan Synod Education Board chuan October 15 hi School Day a hman turin a ruat a. Tun tum hi School Day vawi 4 an hmanna a ni. School Day hmannaah hian pawn lam mi sawm lovin Zirtirtu leh naupangten item chi hrang hrang hmangin hlim takin an hmang a ni.
P.C. Girls’ School-ah hian Class A – VII thleng awmin, Section 14 an awm a. Kum tin hian result tha tak an nei thin a, kum 2006 khan MSLC leh PSLC-ah pakhatna dinhmun (First Position) an hauh ve ve a ni. Kumin hian zirlai 484 an awm a, zirtirtu leh thawktu dang 32 an awm mek a ni.
Moderator Programme
Synod Moderator Rev. Vanlalchhunga chuan October 21 (Pathianni) hian Venghnuai Pastor Bial Kohhrante tlawhin hun a hmang ang.
SMTC-ah Computer Zirna Hawng
October 15 khan Synod Multipurpose Training Centre (SMTC)-ah Certificate in Computer Application Course zirna thar Rev. Lalhmangaiha, Senior Executive Secretary-in a hawng.Rev. Lalhmangaiha chuan Certificate in Computer Application Course zirna hi CWM grant atanga buatsaih a nih thu leh hemi atana SEC-in ruahmanna a siam dan te a sawi a, Pu Vanlalruata, Fingertips Computer Academy Chairman-in Course kalpui dan turte a sawifiah bawk. Computer zir tur hian mi 20 – mipa 11 leh hmeichhia 9 lak an ni a, Computer Course hi Session 2-ah thenin chawhma leh chawhnuah class neih thin a ni ang a, course an zawh hnuah Incentive Prize Rs. 1,200/- theuh pek an ni ang. Synod Multipurpose Training Centre-ah hian Puanthui, Pheikhawk siam leh Laphiar zirna teneih tawh a ni a, heta tanga zir chhuak tam takin eizawnna nghet an nei tawh nghe nghe a ni.
Tuesday, October 16, 2007
Taihmakna - Chhungkuaah
Kan thupui hi tunlai Zoram Thalaite’n kan mamawh ber pakhat a ni awm e. Taihmaknahi,inzirtirasawt chi a nih rual rual in, a bul tanna kawng pawimawh ber chu chhungkua ah a ni tho tho mai. Mahni inchhungkhura taima lemlo, hnatlan nikhua leh midangte hna thawhsak changa taima ber niawm taka lang te pawh hi a awm teuh theih awm a sin. Heng hi a that viau laiin, Ram leh hnam, khawtlang leh chhungkua in hma asawnna tur tak tak a keng chhuak zo meuh lo thung. Chuvangin, hmasawnna tobul ‘TAIHMAKNA’ kan zir ho lai hian a pawimawh ber ‘CHHUNGKUA A TAIHMAK’ hi kan bul tanna tur pawimawh ber a ni hial awm e.
Khawvel zau zawk kan thlirin, ram changkang leh intodelh ramte hi hnam taima an ni zel a, chhuithui zel chuan chhungkuaa bul tan in, tette atanga an nunin Chhungkaw tana taihmakna hi an thanhnan tlat avangin, chhungkaw tana an tangkai theihna tur an zawng hram hram a. Chu chuan hnam leh ram angin a chawikang mai a lo ni. Mahse, heng ram changkang tak tak te nen hian khaikhin diak diak chi chu kan ni hauh lo vang. Mahse, kan phaktawk ang zel a hnam leh ram anga hma kan sawn zel theihna tur atan zirlai tawite i lo zirho dawn teh ang.
CHHUNGKUA AH KAN PAWIMAWH A NI : Thalaite hian chhungkuaah hian pawimawhna lian tak kan nei a ni. Hei hi ka hre tawk lo fo. Kan pawimawhna kan hriat tawk lohna hian kan tihtur puala lum ngei ngei pawh min tihtir lo fo thin. Chu chuan thatchhiatna ah min hruai a. ‘Chhungkuaah hian ka telve a, chanvo pawimawh tak ka chang ve a ni’ tih inhriatna hi kan nun leh kan ngaihtuahna ah hian kan vawn reng a pawimawh. Chu chuan chhungkaw tana thahnemngaihna thar min siam ngei ang a, taihmakna kawngah min hruai ngei ang.’Ka tello in kan chhungkua hi a kal theilo a, ka tel lo chuan chhungkaw kalphung hi a buai thin a ni’ tih rilru pu theuh i la. Chhungkua pawh in hma asawn in, kan tangrual sawt bawk ang.
HEI NGEI HI KTP MEMBER DIKTAK TIH TUR CHU A NI : KTP memberte hi a tamzawk chu zirlai, mahni nu leh pate chawm, kan mamawh engkim mai nu leh pate hnen atanga dawng kan ni awm e. Zirlai ni chiah tawhlo te pawh eizawnna bulfuk tak nei lem lo, tei mai mai kan ni deuh fur awm e. Chu chuan kan phaktawk theuha rawng kan bawlna kawngah pawh harsatna min siam fo thin. Chutih rual chuan KTP member engemaw zat chu zirlai ni chung reng a hnathawh nei mumal lemlo pawhin, mahni phaktawk leh tlin ang tawk tawk a chhungkaw tana tangkai nih tum tlat, hunawl neih ang ang pawh chhungkaw tana hmangral thin kan awm fur tho mai. Hei ngei hi KTP member diktak tih tur chu a ni. Thawhlawm, Faith Promise etc, kan mamawh reng, chutih rualin incheina/thawmhnaw, a nalh leh tunlai thei ang ber ka mamawh reng bawk. Hetiang kan nih laia, hman awm deuh mai a fai leh tharlam sar (fresh) reng, taksa leh thawmhnaw rimtui em em reng mai a kan teihawi tam lutuk hi chu kan sim a hun mai nilo in, sim hi atuah in atuah tawh zawk a ni. Kan mamawh zawng zawng kan tuak ngah zolo a nih pawh in, a then azar tal tuak chhuak thei tur leh chhungkaw tana tangkaina nei thei tura taihmakna nen kan thawhchhuah a hun.Tunah ngei hian. Kan mamawh a dil chhuah theihna hmun atanga inthlahrunna nei miah lo a dil chhuak reng tura siam kan ni bik lo, chutiang ni turin Pathian in min duang bawk lo, kan ngaihtuah ve a, kan thawh chhuah ve hi chu a ngai a ni.
THAWH UAR LA,TAWNGTLEM RAWH : Tunlai Zoram thalaite hian ‘Thawh uar la, tawngtlem rawh’ tih hi a letling in kan kalpui ta zawk niin a lang. Tunlai ah chuan ‘Thawh tam i duh chuan thawk tlem rawh’tih hi kan thupui ni zawk awm tak a ni. “KTP member te hi kan ka hi chu a kal khawp, kan khabe pawh a par na rawh, kan tawng thei em em, kan tha erawh a nem hrat’ ka ti ru thin. Tunah hian mahni inchhung theuh han mitthla teh ang u le. Tukin zing kan thawhhlim atanga, vawiin tlai nitlak thleng khan engnge kan thawh le? Mahni inchhung khur tana tangkai tur, chhungkaw hmasawnna tur kawng khat tal kan thawk em? Nu leh Pa, tar chaklo zawk te’n thahnemngai tak a chhungkaw hmasawnna tur leh nawmsak zawkna tur thil an tih mek lai khan engnge kan tih ve le? Tukin zinga Pa ber vawkchaw pe tur takngial pawh kha thophang chup chungin kan thlir liam ta mai em ni? Nu ber Archaw pe tur takngial pawh kha, thawhhlim thingpui no dawm a, en ngai en voh voh chungin kan uipui tuilian thlir voh voh mai lo maw? Nu ber, Archaw pe zo in, insuk tur a vawmkhawm lai khan, kan thawmhnaw balte, thahnemngai tak a lo zawngkhawm ve in nu ber suk tur zingah khan kan vawmlut ve mai em ni? Chutiang chuan tukin atang khan kan hun bul tanna kan hmang a nih chuan, eng thil tha tak vawiin nileng khan thawk hlawm ang i maw le?Mahni inchhungah inthlahrunna chhete tal kan neilo a nih chuan khawvela mi piang fuhlo ber te zinga mi kan ni ngei ang. Chutiang zawng chuan kan in ngaihtuah ngai em? Nge,‘nu leh pa te tihtur reng alawm’tiin kan thlirliam satliaha, hnialfung bawplawk tak tak leh tawngkam thar bon(bawn) pui pui hmangin nu leh pa, chaklo zawk te kan hnial zuah zuah ringawt zawk le? Helai ringawt pawh hi bengsika ngaihtuah tham a tling hial awm a sin.
Tunlai thalaite hi Maimaw Pangang (Silk Pangang) ang tak tak hi kan tam khawp in a lang. Awmhmuna ei tawp mai, ei tur a chesawn peih tawk tawk, KTP Social, hnatlang leh activities dang danga taima leh hlah ngai hauh lo, phur em em mai, chhungkaw dinhmun leh harsatna in a chimbuai phak miah loh niawm taka thawveng fe fe, Chaw khawn hawi cham (Champ) ve vah ringawt, rawngbawlna, nun tak taka luhchilh a ngaih huna tlanchhe reng mai bawk si hi a tamzawk chu kan ni mai awm a sin. Kan chaw ei lah hi a tui tlang em em mai mai si a, kan banpuam leh fuke te lah chuh, luhkapui ban tiat tiat. Mahse chhungkaw tana hmasawnna tur hnathawhna atan chuan tha reng reng a awm leh si lo. Fuke lianpui, hmantlak siloh, ‘lianzawi satliah’ ringawt kan ni thei mai ang em? Chhungkuaa mahni phaktawk a tangkai thei tura taihmak chhuah tum chuang miah lo hi kan ni ber zawk mai lo maw? Nitin hian zing thawhhlim atanga tlai ni tlak thleng hian chhungkaw tana kan tangkai ve theihna tur zawng in, ‘engnge ka tih ve theih ?’ tih hi kan thuvawn ni reng se, chu chuan chhungkua a ti hmasawn ang a, ram leh hnam pawh in hma a sawn in, kan thlarau nun thleng in kan thang ngei ang. Kristian chu taima tur kan ni. Tawng lam tlem a, a thawh lam kan uar a hun ta. Chutiang tur chuan kan Ram leh hnam, chhungkua leh Kohhran hian Thalaite hi min mamawh in min au lawm lawm reng a ni.